Яңалыклар

Бәйрәм белән, хөрмәтле Әниләр!

Елның Иң якты, иң җылы, иң бәхетле көне бүген! Бүген дөнья иң кадерле кешеләребезнең елмаюы белән яктыра! Галәмнең барлык телләрендә дә «әни» сүзе шундый ук наз белән, изге булып яңгырый,тормыш бүләк иткән олы йөрәкле кешеләребезгә тирән ихтирам хисен уята. Бу матур көн hәрберебез өчен әhәмиятле! Бәйрәм белән, кадерле ӘНИЛӘРЕБЕЗ! «Әни» диеп язып куйдым Яңа яуган ак карга. Таптамагыз! Һич ярамый «Әни» сүзен таптарга. ЗәкияТуфайлова

27.11.2022

«ШАЯН ТВ» каналының туган көненә багышланган «ШАЯН БАЛАЧАК» бәйрәм концерты гөрләп узды!

Татарстан Республикасы Президенты Рөстәм Нургали улы Миңнеханов хәер-фатыйхасы белән ачылган тәүлек әйләнәсе татар телендә эшли торган бердәнбер балалар каналына быел 4 ел тулды. Шул уңайдан, «ШАЯН ТВ» каналы дусларына бүләк әзерләде! 25 нчы ноябрь көнне үзенең туган көненә багышланган «ШАЯН БАЛАЧАК» бәйрәм концертын оештырды! «Сәйлән» фестивале җиңүчеләре башкаруында иң матур балалар өчен җырлар, онытылмаслык чыгышлар һәм, әлбәттә, «Балачак җыры» балалар җыры бәйгесе клипларының премьералары концерт программасын бизәде! Чара башлангачы иcә кунакларга «ШАЯН ТВ» һәм Татарстан Республикасы Президенты каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе белән берлектә эшләнгән «Балачак җыры», «Яраткан шигырь», «ШАЯН Әлифба» проектлары һәм «Татар балалар җыены» прграммасы тәкъдим ителде. Бәйрәм чарасы «Сәйлән» IV балалар телевизион татар җыры фестивале лауреатлары чыгышлары, һәм «Балачак җыры» бәйгесендә катнашып, җиңү яулаган 5 клипны тәкъдим итү белән үрелеп барды. «Сәйлән» фестиваленең дүртенче сезоны җиңүчеләре исә татар эстрадасы йолдызлары белән бер сәхнәдә балкыды! Алар арасында: Зәйнәб Фәрхетдинова, Илгиз Мөхетдинов һ.б. йолдызлар урын алды. Шулай ук бәйрәм чарасында «Сәйлән» телевизион җыр фестиваленең җиңүчеләренең бүләкләү тантанасы да узды, алар үзләренең лаеклы статуэткаларына ия булдылар! Моннан тыш, концерт кунакларын үзенчәлекле күңел ачу программасы һәм «ШАЯН ТВ» каналы алып баручылары һәм блогерларыннан күп төрле иҗади сюрпризлар сөендерде. YouTube эшчәнлеген күрсәтү, «ШАЯН ТВ» каналының Сарман, Казан шәһәренең «Адымнар» күп телле мәктәбе һәм Димитровград шәһәреннән булган филиаллары һәм TV-блогерлар белән очрашу оештырылды. Шуны да әйтеп үтәргә кирәк, бәйрәм чарасында дәрәҗәле кунаклар да катнашты. Балаларны котларга Татарстан Республикасы Президенты каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе рәисе Марат Готыф улы Әхмәтов, Татарстан Республикасы Дәүләт Советының Мәгариф, мәдәният, фән һәм милли мәсьәләләр комитеты рәисе Айрат Ринат улы Зарипов һәм «Яңа Гасыр» телерадиокомпаниясенең генераль директоры Илшат Юныс улы Әминев та килде. «ШАЯН ТВ» каналының туган көненә багышланган бәйрәм концерты гөрләп узды! Яраткан тамашачыларыбыз нәни йолдызларыбызны кайнар алкышларга күмделәр, рәхмәт сүзләрен җиткерделәр!

26.11.2022

Ял көннәрендә «Хайваннар патшасы» мультсериалын карагыз!

Ял көннәрендә «ШАЯН ТВ» каналында премьера! «Хайваннар патшасы» мультсериалы! Көчле арыслан җәнлекләр патшалыгы белән идарә итә алырлык варис эзли. Яңа хакимнең роленә ике кандидат бар: бозылган, узынган шаһзадә һәм яхшы күңелле ишәк - Мангу. Мангуның эш тәҗрибәсе бөтенләй булмаса да, ул үзенең җиңә алачагына оптимистик рухта ышана. Мангу патшалыкта иң югары дәрәҗә алырга хыяллана. Кечкенә шәһәрдә туган һәм ярлылыкта үскән ишәк беркайчан да байлыкны тормышта төп кыйммәт дип санамый. Әтисе аны һәрвакыт хыялланырга һәм үз хыяллары өчен көрәшергә өйрәтә. Тәхеткә таба барганда Мангу төрле авырлыклар һәм киртәләр белән очрашачак. Чын күңелдән ышанган тугры дуслары исә аңа бу юлда ярдәмгә киләчәкләр! Шимбә һәм якшәмбе көннәрендә 14:00 һәм 22:00 сәгатьләрдә «ШАЯН ТВ» каналында карагыз!

25.11.2022

Әкият илендә: «Төлке белән Аю»!

Бервакыт Төлке белән Аю юлда калач табып алганнар. Урман йортына кереп, калачны урталай бүлгәннәр: яртысы —Аюга, яртысы Төлкегә тигән. Төлке үз өлешен шундук ашап бетергән. Ә Аю кабып кына караган да соңрак ашарга калдырган. Йокларга яткан болар. Аю хырылдый башлауга, Төлке аның өлешен дә ашап куйган. Төнлә Аю уянган. Калачын ашарга теләгән. Әмма аннан җилләр искән. Аюның бик каты ачуы килгән. — Болай булгач, мин сине ашыйм, Төлке, — дигән. — Гаеплемен, абзыкаем, синең алда. Ашасаң ашарсың инде. Әмма минем итем пешергәч тәмлерәк була, — ди икән Төлке. — Мич кабызырга ут юк ич! — Әнә бит ут, — дип, айга күрсәтә икән Төлке. — Ул ут бик биектә ич, алып булмый. — Биеген биек тә соң, әнә теге чыршы башына менсәң алып була! Мен, абзыкаем, курыкма, — дип үгетли моны Төлке. Аю кулына чыра тота да чыршы башына үрмәли. Чыраны айга сузып карый, буе җитми. — Ныграк үрел, абзыкаем! — дип өйрәтә Төлке тегене, җирдән торып, — әз генә үреләсең калды. Сикер, сикер, шундук җитәсең! Аю Төлкене тыңлап сикергән икән, чыршы башыннан түбән тәгәрәгән. Әз генә үлми калган, ә Төлке табанын ялтыраткан. Мари халык әкияте

23.11.2022

«Смарта һәм могжизалы букча»!

Гаҗәеп күңелле «Смарта һәм могжизалы букча» мультсериалында барысын да белергә теләүче кыз Смарта турында белерсез! Аның могҗизалы сумкасында ниләр генә юк: навигатор һәм смартфоннан алып, инглиз теле сүзлегенә кадәр файдалы әйберләр табарга була. Аңа бу әйберләр дусларына ярдәм итү һәм яңа күнекмәләр өйрәнү өчен кирәк. Смарта үзенең тугры дусты, баллы ашарга яратучы Спотти белән бергә төрле кызыклы биремнәр уйлап таба, көлкеле җырлар җырлый, санамышлар ярдәмендә санарга өйрәнә, инглиз теле һәм юл кагыйдәләре белән таныша - гомумән, тормыштагы мөһим әйберләрне кызыклы һәм җиңел итеп өйрәнә. Бу мультсериал сезгә әйләнә-тирә дөнья турында күбрәк белергә ярдәм итәчәк. Смарта белән бергә сез кызыклы дәресләр алачаксыз: күп кенә яңа сүзләр һәм саннар беләчәксез, геометрик фигураларны истә калдырачаксыз һәм хәтта аларны ясарга да өйрәнәчәксез! «Смарта һәм могжизалы букча» мультсериалын дүшәмбедән-җомгага кадәр 13:45 һәм 21:45 сәгатьләрдә «ШАЯН ТВ» каналында карагыз!

23.11.2022

Авторлар һәм композиторлар игътибарына!

Авторлар һәм композиторлар игътибарына! Татарстан Республикасы Президенты каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән «ШАЯН ТВ» каналы «Балачак җыры» бәйгесенең дүртенче сезонын игълан итә! Ә димәк, бик тиздән нәкъ сезнең җырыгыз хит булачак! Без сездән өр-яңа шигырьләр, оригиналь көйләр көтәбез! Бәйгенең максаты – татар телендә балалар өчен җырлар иҗат итүче шагыйрь һәм композиторларны барлау, шул җырларны таныту. Җиңүчеләрне шәп бүләкләр көтә: акчалата приз, җырның профессиональ аранжировкасы һәм клибы! Балалар өчен язылган җырның аудиоязмасын һәм текстны [email protected] адресына җибәрегез! Бәйгедә катнашу бушлай. Гаризалар 1 мартка кадәр кабул ителә!

22.11.2022

Бәйрәм уңаеннан, «ШАЯН ТВ» кунаклар кабул итте!

Бүген Бөтендөнья телевидение көне уңаеннан, «ШАЯН ТВ» каналында «Адымнар – белемгә һәм татулыкка юл» полилингваль гомуми белем бирү мәктәбе укучылары кунакта булдылар. Укучылар «ШАЯН ТВ»ның татар телендә белем һәм тәрбия бирү, телне үстерү өлкәсендә эшләгән хезмәте белән бик кызыксынып таныштылар. Студиябез буйлап сәяхәт иттеләр, төшерү серләренә төшенделәр, дубляж студиясендә дә кунакта булдылар. Популяр тапшырулар, аның алып баручылары һәм катнашучылары белән таныштылар, алар белән якыннан аралаштылар. Әле алай гына да түгел, бәйрәм уңаеннан алар безгә күчтәнәчкә җыр да әзерләп килгәннәр. Укучыларга студиябез буйлап экскурсия бик ошады, очрашудан барыбыз да бик канәгать калдык!

21.11.2022

Бүген - Бөтендөнья телевидение көне!

21 ноябрь - Бөтендөнья телевидение көне! Бүгенге тормышыбызны телевидениесез күз алдына да китереп булмый. Ул күп кеше өчен төп мәгълүмат чыганакларының берсе булып тора. Зәңгәр экраннар аша без иң кайнар яңалыкларны белеп торабыз, җан азыгы алабыз. Мәгълүматны халыкка җиткергәндә телевидение хезмәткәрләреннән һөнәри осталык кына түгел, югары әхлакый сыйфатлар, еш кына кыюлык һәм сабырлык та сорала. Бүген «ШАЯН ТВ» хезмәткәрләре дә һөнәри бәйрәмнәрен билгеләп үтә дигән сүз! Хөрмәтле каналыбыз хезмәткәрләре! Сезне Бөтендөнья телевидение көне белән котлыйбыз! Кадрдагы һәм кадр артындагы барлык хезмәткәрләргә яңа идеяләр, иҗади проектлар, бетмәс-төкәнмәс энергия һәм сәламәтлек телибез!

21.11.2022

1 ... 169 170 171 172 173 ... 375

Яңа сайт!