«МИНЕМ КӨЗГЕ КАНИКУЛЛАРЫМ» бәйгесенең финалистлары билгеле

«ШАЯН ТВ» «Включайся-2025» Рәсәй фестивалендә җиңү яулады!

Безнең телеканалның яңа проекты – «КРАШ ТЕСТ» – «Включайся-2025» яшьләр медиа фестивалендә җиңүгә иреште! «КРАШ ТЕСТ» – йолдызлы кунакларны «ныклыкка» тикшерә торган үзенчәлекле проект. Һәр чыгарылыш берничә этаптан тора: классик әңгәмә, интернетта киң таралган челленджлар һәм заманча трендлар. Максат – йолдызлар белән ихлас әңгәмә оештырып, аларны яңа яктан күрсәтү. Тапшыруда канал блогерлары Кәрим, Алимә, Ислам, Зәйнәп һәм Ассель катнаша. Алар кунакларны төрле сынаулар аша үткәреп, тамашачылар өчен мавыктыргыч тамаша тудыра. Беренче чыгарылышта популяр җырчы, актриса һәм блогер-миллионник Тая Скоморохова кунак булды. Тапшыруны әлеге сылтама аша кереп карарга мөмкин. «КРАШ ТЕСТ» проекты – ул яңа буын өчен кызыклы формат. Җиңүебез – безнең иҗади команда өчен зур бәя һәм милли медиаконтент үсешенең күрсәткече булып тора. «ШАЯН ТВ»  командасын әлеге зур җиңү белән котлыйбыз!

Казанда «Яңа дулкын» фестивале башланып китте

Бүген Казанда «Яңа дулкын»(«Новая волна»)  фестивале башлана. Алты көн дәвамында шәһәр музыка үзәгенә әвереләчәк, ә төп мәйданчык итеп Яңа Савин районы сайланган. Шул уңайдан 21-26 август көннәрендә районның кайбер урамнары ябылачак. Чикләүләр көн саен 16:00 дән төнге сәгать 00:00 гә кадәр гамәлдә булачак. Мэрия шәһәр халкына маршрутларны алдан планлаштырырга һәм чикләүләрне исәпкә алырга киңәш итә. Казан халкы һәм кунаклары өчен уңайлык тудыру максатыннан, 21-26 август көннәрендә җәмәгать транспорты гадәттәгегә караганда озаграк – төнге 00:00 гә кадәр эшләячәк. Озайтылган режим №10, 10а, 18, 33, 35, 35а, 36, 45, 46, 55, 60, 74, 75 автобуслар, №5, 5а, 6, 7 трамвайлар һәм №1, 2, 13 троллейбуслары маршрутларына кагыла. Юлларда булган вакытлыча уңайсызлыкларга карамастан, фестиваль шәһәр халкына бәйрәм атмосферасы һәм популяр артистлар чыгышлары бүләк итәргә вәгъдә итә!

Каникул даталары билгеле!

Мәктәп каникуллары кайчан була? Чирекләп укучы мәктәпләр өчен каникуллар түбәндәгечә билгеләнде: көзге: 25 октябрь – 2 ноябрь кышкы: 31 декабрь – 11 гыйнвар язгы: 28 март – 5 апрель җәйге: 27 май – 31 август

КАСТИНГНЫҢ икенче туры узды

Бүген «ШАЯН ТВ» студиясендә КАСТИНГНЫҢ икенче туры узды Булачак яшь хәбәрчеләр барысы да бик сәләтле! Курыкмыйча камера алданда үзләрен күрсәттеләр, төрле иҗади биремнәрне үтәделәр. Алар өчен бу көн – журналистика һәм телевидение дөньясына зур адым! Уңышлар теләп калабыз!

«ВКЛЮЧАЙСЯ-2025»!

«ВКЛЮЧАЙСЯ-2025» Рәсәй балалар телевизион фестиваленнән Ислам Хәбибуллин һәм Ассэль Сәләхова сезгә кайнар сәлам җиткерәләр! Аларга зур уңышлар теләп калабыз! Бу каналның яшь алып баручылары өчен зур дәрәҗә һәм алыштыргысыз тәҗрибә мәйданы! Афәрин!

«ТАТАР СҮЗЕ»: билетлар саны чикле!

«ТАТАР СҮЗЕ» ГАЛА-КОНЦЕРТЫ  ЕЛНЫҢ ИҢ ЗУР МӘДӘНИ БӘЙРӘМЕН КҮРМИ КАЛМА!  Кайчан: 25 сентябрь Кайда: Казан филармониясе Сәхнәдә – 4500дән артык катнашучы арасыннан сайлап алынган иң сәләтлеләре! Үзешчән сәнгать осталарыннан алып, атаклы артистларга кадәр – барысы да бер сәхнәдә! Җиңүчеләргә: акчалата премияләр исемле таныклыклар мактаулы бүләкләр Ә яраткан тамашачыга – ЗУР ЙОЛДЫЗЛАРдан күңелле чыгышлар! «Голос. Дети» финалисты Сәид Галиуллин халыкара конкурслар лауреаты Рөстәм Хөсәенов Татарстанның халык артисты Зәйнәп Фәрхетдинова Алар барысы да бу кичне онытылмас итәчәк! Әле ЯШЕРЕН КУНАКта булачак! Аның исеме – зур сер! Шуңа күрә килми калма! БИЛЕТЛАР саны чикле: BiletOn tatfil.ru Казан филармониясе кассалары

Бөтендөнья фотография көне

Бу көн – фотога төшерергә яратучылар һәм дөнья матурлыгын объектив аша күрә белгәннәр өчен аеруча мөһим бәйрәм! Ләкин фотография – ул  селфи һәм социаль челтәрләрдәге фильтрлар гына түгел. Беренче фото 1826 елда француз Жозеф Ньепс тарафыннан төшерелә, һәм моның өчен якынча 8 сәгать вакыт кирәк була! Дуслар белән бер мизгелне «тоту» ничек кыен булганын күз алдына гына китерегез! Аннан соң Луи Дагер дагерротип дигән тизрәк блуган ысул уйлап таба, һәм фотография дөньяга бик тиз тарала. Фото аша кешеләр хис-кичерешләрен күрсәтә, сәяхәтләре белән бүлешә, маҗаралары турында сөйли һәм хәтта гаделлек өчен көрәшә ала. Менә сезне гаҗәпләндерә торган берничә факт: Дөньяда иң кыйммәтле фото «Rhein II» дип атала һәм аның бәясе якынча 7 миллион доллар Иң иске сакланган фотода кеше 1838 елда төшерелгән. Ул кеше бик хәрәкәтләнмәгән, чөнки экспозиция бик озак ясала торган булган Фотолар хәтта кешеләрнең гомерен дә коткара ала: камералар галимнәргә хайваннарны күзәтергә, фаҗигаларны булдырмаска һәм космосны өйрәнергә ярдәм итә Селфи – яңа күренеш түгел! Иң иске селфи 1839 елда төшерелгән. Беренче төсле фото 1861 елда ясалган, әмма ул төс хәзерге кебек түгел, бөтенләй башкача күренгән. Бүгенге көндә телефонда камера һәркемдә диярлек бар. Видео төшерергә, эффектлар кулланырга, кызыклы сторислар ясарга һәм без оештырган күп кенә бәйгеләрдә дә катнашырга мөмкин. 19 июнь – камераны кулга алып, гадәти булмаган нәрсәләрне төшереп карарга шәп мөмкинлек: күләгәләрне, шәһәр детальләрен фотога төшерергә яки дуслар белән фотопроект оештырырга була. Кайчак гадәти фото фильтрсыз да иң матуры була, һәм бәлки нәкъ менә сезнең кадр киләчәктә дөньяга танылыр һәм башкаларны илһамландырыр!

Иң якын дустыңны котларга онытма!

Дуслар – безнең тормышны яктырак, күңеллерәк һәм җылырак итә торган кешеләр. Алар авыр мизгелләрдә безне яклый, бәхетле көннәрдә белән шатлана һәм һәрвакыт тыңларга әзер. Нәкъ менә бүген бөтендөньяда Иң якын дуслар көне билгеләп үтелә! Бу көн безгә чын дуслыкның кадерен белергә кирәклеген искә төшерә. Әллә ни зур нәрсәләр эшләргә кирәкми: дустыңа «рәхмәт» әйтү, җылы хәбәр җибәрү яки бергә вакыт уздыру да җитә. Кайчак кечкенә гамәлләр иң зур мәгънәгә ия була. Иң якын дуслар – көлеп еларга, серләр белән бүлешергә һәм үзең булып калырга мөмкин булган кешеләр. Алар безгә үсәргә ярдәм итә, яңа идеяләргә рухландыра. Шулай итеп, 18 июнь – үзеңнең иң якын дусларыңны искә алу, җылы сүзләр әйтү һәм бәлки кечкенә дуслык бәйрәме оештыру өчен менә дигән мизгел. Чын якын дуслар – алтын байлык ул.

Кура җиләгеннән тәмле варенье

Август – җәйнең соңгы ае, һәм бу вакытта бакчаларда кура җиләге өлгерә. Әлеге тәмле җиләкләрдән ясалган варенье – җәйнең чын тәме, аны һәркем ярата! Кура җиләге вареньесы ничек ясала? Кура җиләге җыелып, чистартылып, шикәр белән кайнатылып, тәмле варенье әзерләнә. Бу процесс балалар өчен дә кызыклы һәм файдалы шөгыль була ала. Әти-әниләр белән бергәләп, кура җиләге вареньесын әзерләү – җәйге ялларның күңелле вакыты. Кура җиләге вареньесы белән нәрсәләр әзерләргә була? Иртәнге ашка ипи өстенә Кура җиләге вареньесын сылап, тәмле һәм туклыклы ризык әзерләргә була. Йогуртка яки сөт ризыкларына кура җиләге вареньесын өстәп, тәмле десертлар ясарга мөмкин. Пироглар һәм бәлешләр: кура җиләге вареньесы белән пироглар яки бәлешләр пешереп була. Кура җиләге вареньесы нәрсә өчен файдалы? Кура җиләге витаминнарга бай, иммунитетны ныгыта, салкын тиюләрдән саклый. Тәмле җәйге җимешләрне ашап калыгыз! Тиздән көз....

«ДилиНали» белән йорт хайваннарын өйрәнәбез

«ДилиНали» тапшыруының яңа чыгарылышы дөнья күрде! Бу юлы без сезнең белән йорт хайваннары дөньясына мавыктыргыч сәяхәт кылачакбыз. Хайваннарның исемнәрен һәм тышкы кыяфәтләрен өйрәнәбез, ә күңелле көйләр бу барысын тагын да кызыклырак итәчәк. Музыкаль формада йорт хайваннары белән танышу мөмкинлеген кулдан ычкындырмагыз – барысы да яңа чыгарылышта! Безнең ВКонтакте төркемендә карарга мөмкин.

КАСТИНГ: икенче этапка узучылар билгеле!

«ШАЯН ТВ» балалар хәбәрчеләре кастингының икенче этабына узучылар билгеле булды! «ШАЯН ТВ» каналы яңалыклар өчен яңа йөзләр эзләүне дәвам итә! Республикабызның төрле почмакларыннан дистәләгән видеогаризалар килде, һәм жюри икенче турга узучылар исемлеген әзерләде. Икенче этапка үтүчеләр: Әхмәтова Диана Рөстәм кызы (Казан) Вәлиева Сәминә Инсаф кызы (Казан) Вәлиева Алимә Таһир кызы (Казан) Веденина Юлиана (Яшел Үзән) Гәрәева Әминә Илмир кызы (Казан) Галиев Кәрим Раушан улы (Казан) Гаффаров Алмаз Альфред улы (Казан) Гыйззәтуллина Сәрбиназ Радил кызы (Казан) Җаппаров Бәхтияр Булат улы (Казан) Җаппарова Мәрьям Булат кызы (Казан) Зиннурова Зәлия Зөлфәт кызы (Казан) Зәйнетдинов Әсхәт Алмаз улы (Казан) Исрафилов Әмир (Казан) Кәримова Айсылу Зөлфәт кызы (Казан) Коротышкин Ярослав Дмитрий улы (Казан) Мәрданова Раида Рушан кызы (Балтач районы) Мәрданов Раил Рушан улы (Балтач районы) Миргаязов Аслан Алмаз улы (Казан) Нотфуллина Зәрина Алмаз кызы (Яшел Үзән) Сәләхова Ассэль Илнар кызы (Казан) Сираҗиев Ирхан Искәндәр улы (Биектау) Славина Наилә Тимур кызы (Казан) Сорокина Евгения Эдуард кызы (Казан) Скворцов Никита (Яшел Үзән) Сәләхов Нариман Марат улы (Арча) Табаков Владимир Родион улы (Лаеш) Таһиров Юныс Сухроб улы (Казан) Төхвәтуллина Наилә Румил кызы (Казан) Улуташ Әмирә Ибраһим кызы (Казан) Хәбибуллин Ислам Илнур улы (Казан) Хәйдәрова Сәидә Илдар кызы (Казан) Чихирина Леонтия (Яшел Үзән) Шәрәпова Сылу Риназ кызы (Казан) Юнысов Әмирхан Әнүзәр улы (Казан)  Икенче этап Казандагы «ШАЯН ТВ» студиясендә узачак.  Җиңүче канал яңалыкларының яңа йөзе булып, Татарстан тамашачыларына көн вакыйгалары турында сөйли алачак!