Яңалыклар

«ШАЯН ТВ» Республика Яңа ел чыршысында!

«ШАЯН ТВ» Республика Яңа ел чыршысында!

25 декабрь көнне - мәркәзебез Казанда Республика Яңа ел чыршысы узды. Бу елны «Татнефть-Арена» боз сараенда ел дәвамында үзләрен төрле яктан актив күрсәткән балалар җыелды. Татарстан Республикасы Рәисе Рөстәм Нургали улы Миңнеханов яшь тамашачыларга үзенең котлау сүзләрен җиткерде. «ШАЯН ТВ»каналы да әлеге бәйрәмдә актив катнашты. Балаларга кызыклы анимацион программа, матур фотозона, аквагрим буенча остаханәләр оештырылды. Ә соңыннан нәни дусларыбызга истәлеккә үзенчәлекле буләкләр дә уйнатылды. Шулай ук «ШАЯН ТВ» каналының актив һәм сәләтле балалары Рөстәм Нургали улы Миңнеханов өчен иҗади перфоманс форматындагы каршы алу да оештырдылар.Чарада каналның яшь йолдызлары катнашты: «ШАЯН ТВ»ның «Сәйлән» телевизион фестивале җиңүчесе, «Голос.Дети» проектының суперфиналисты – Сәид Галиуллин, «ТЭФИ KIDS - 2024» бәйгесе җиңүчесе – Ислам Хәбибуллин, блогерыбыз – Ассэль Сәләхова, «Татар сүзе» Халыкара нәфис сүз телевизион бәйгесе җиңүчесе, Россия һәм Халыкара фестивальләр лауреаты – Рөстәм Хөсәенов һәм каналның алып баручылары.Чыгыш «ЕжеВикА» АРТ-фолк группасы башкаруындагы җыр белән тәмамланды! Шулай ук чара кысаларында сәләтле балалар белән түгәрәк өстәл оештырылды. Биредә Сәид Галиуллин Республикабыз Рәисе белән аралашты, казанышлары, хыяллары белән уртаклашты, яраткан җырын да башкаррды! Афәрин, безнең «ШАЯН»нарыбыз!

26.12.2024
«Серле Санта» - кышның иң популяр уены!

«Серле Санта» - кышның иң популяр уены!

Дуслар, ниһаять, урамда кар һәм Яңа ел тылсымы да сизелә башлады! Димәк, могҗиза, бүләкләр һәм күңелле уеннар вакыты килеп җитте! Дусларыгыз белән яки сафта уйный ала торган иң кызыклы уеннарның берсе - «Серле санта» уены. Бу уенда һәр катнашучы «серле» бүләк бирүче булып тора. Ягъни сез бер кешегә бүләк бирәсез, әмма кем икәнегезне әйтмисез дигәнне аңлата! «Серле санта» уенына чек-лист: 1. Дусларыгызны чакырып, 5-20 кешедән торган төркем җыегыз. Кеше күбрәк булса, күңеллерәк! 2. Бүләкнең бәясе буенча килешегез, һәр кеше үзенчәлекле һәм алырга мөмкин булган әйберләр сайласын. 3. Һәр катнашучы үз исемен кәгазьгә яза. Аннары барлык кәгазьләр тартмага салына. Чират буенча һәр уйнаучы үзенә кәгазь тартып ала.Бу сезнең бүләк бирәчәк кешегез булачак! Шулай ук махсус онлайн сервислар белән дә куллана аласыз. 5. Алга таба дустыгыз өчен бүләк сайлау вакыты! Аның кызыксынуларын исәпкә алырга тырышыгыз. 6. Билгеләнгән көндә җыелып, бүләкләрне ачыгыз. «Серле Санта» уены - дуслар белән вакыт уздыру һәм онытылмас хәтирәләр тудыру өчен бик шәп мөмкинлек! Яңа елыгыз күңелле мизгелләр белән тулы булсын!

19.12.2024
Әкият илендә: «Куян кызы»

Әкият илендә: «Куян кызы»

Бер Соры куянның үзе төсле зур колаклы, бик иркә, бик кадерле бер кызы булган. Ул аны бик-бик ярата икән. Көннәрдән беркөнне Куян иркә кызына өр-яңа киез итекләр алып кайтып биргән. —        Мә, бәбкәм, аякларың туңмасын, сызламасын,— дигән. Кызы бу бүләкне бик шатланып алган. Әнисенә рәхмәтләр укыган. Хәзер инде ул, яңа киез итекләрен киеп, рәхәтләнеп йөри икән. Ләкин Куян кызы җылы итекләргә өйрәнмәгән булган, ул алардан бик тиз туйган, салып ташлаган. Әнисе тапмасын дип, ал арны яшереп куйган. Әнисе аларны эзләп табып баласына кигезә, ә ул салып ташлый икән. Әнисе кигезсә, ул салган, әнисе тагын кигезгән, ә ул салып ташлаган. Кар өстеннән дә, боз өстеннән дә яланаяк йөгерә икән. Бер көн буе шулай йөгергән, икенче көнне дә шулай яланаяк йөргән, өченче көнне инде аксый-аксый әнисе янына килгән. —        Әни, әни, минем аягым бик авырта! — дигән. Әнисе аның аякларына караган да аптырап калган. —        Кызым, кызым, якты йолдызым, синең аягың шешкән ич,— дигән. —        Инде ни эшләргә? — дип уйга баткан Куян.— Бу баланы кая алып барырга, ничек дәваларга? — дип кайгырган. Шулвакыт нәрсәдер кычкырган. Куян агач башына күтәрелеп караган икән — Тиенне күргән. Ул Куянга болай дигән: —        Кайгырма, туганкай, йомшак Куянкай, кызыңның аягын бик тиз төзәтеп була. Моның өчен Доктор Айболитка барырга, аңардан киңәш сорарга кирәк,— дигән. Куянга чын-чынлап булышырга тотынган, Доктор Айбо-литның өенә үзе илтергә булган. Куян кызын күтәргән дә Доктор Айболитка киткән, Тиен, агачтан агачка сикереп, аңа юл өйрәткән. Барып җитсәләр, Доктор Айболитның эше бик күп икән, аңа урманның төрле ерткычлары дәваланырга килгәннәр икән. «Балаларны чиратсыз карыйм мин»,— дигән Доктор Айболит. Куян кызын доктор бүлмәсенә алып кергәннәр, нәрсә белән авыруын сөйләп биргәннәр. Доктор Айболит Куян кызының аягына дарулар сөрткән һәм аңа болай дигән: — Аягың төзәлгәч, киез итекләрне инде салкын көннәрдә бер дә салма, сүзне тыңла, тагын начар хәлгә калма,— дигән. Доктор Айболитка алар бик зур рәхмәтләр әйткәннәр, саубуллашып өйләренә кайтып киткәннәр. Өч көн дигәндә, Куян баласының аягы төзәлгән. Ул инде хәзер киез итеген бер дә салмый киеп йөри икән. Абдулла Алиш    

09.12.2024
Казанда Яңа елга кадәр кар ятачакмы?

Казанда Яңа елга кадәр кар ятачакмы?

2024 ел планетада иң җылы ел буларак тарихка керәчәк. Декабрьдә температура аномалиясе булу сәбәпле Казанда кар ятмады. Бу кошларның үз-үзен тотышына да тәэсир итте, алар җылы якка китәргә ашыкмады. Кышлар җылы булу сәбәпле, күчмә кошларның үз-үзен тотышы үзгәрә. Ел саен аларның күбесе шәһәрләрдә кышларга кала, чөнки сулыклар туңмый, азык базасы бар. Кар да яварга ашыкмый. Яңа елга кадәр кар ятачак, әмма эш аның күләмендә. Синоптиклар фаразлавынча, бер ай эчендә явым-төшем норма чикләрендә көтелә, ул Казан өчен якынча 50 мм тәшкил итә. Декабрьдә Казанда уртача айлык температура -7, -8 градус, ә Татарстанда -8,9 градус булыр, дип көтелә. Фото: Яндекс  

06.12.2024
Гөлназ Сәфәрова «Татар радиосы»ннан китүенең сәбәбен әйтте

Гөлназ Сәфәрова «Татар радиосы»ннан китүенең сәбәбен әйтте

«Килде-Китте ШОУ»ның яңа чыгарылышының кунагы – Татарстанның атказанган артисты, кабатланмас Гөлназ Сәфәрова. Популяр алып баручы «Татар радиосы»ннан ни өчен китүе, эшендәге принциплар һәм тыюлар хакында сөйли. Эксклюзив әңгәмәне сылтама буенча узып, «ШАЯН ТВ»ның YouTube каналында карагыз!  

06.12.2024
Санта-Клаус үзенең туган көнен билгели

Санта-Клаус үзенең туган көнен билгели

Бүген, 6 декабрь көнне Санта-Клаус үзенең туган көнен бәйрәм итә! Санта бабайга ничә яшь тулуы, ни өчен аның һәрвакыт кызыл киемдә йөрүе һәм башкалар турында танышыйк! * Кем ул Санта? Сантаның прототибы рус халкының изге Николае булган һәм ул бөтенләй дә Төньяк полюста яшәмәгән. Ә Санта-Клаусның туган урыны Төркия территориясендә урнашкан Анатолия ярымутравы санала. * Аңа ничә яшь? Санта-Клаус 1809 елда барлыкка килә. Кайчандыр ул балаларга бүләкләрне 6 декабрьдә өләшсә, үзгәртеп кору елларында әлеге көн 24 нче декабрьгә үзгәрә. * Каян барлыкка килгән? Америкада Санта турында 1650 елларда Яңа Амстердам җирлегенә (хәзерге Нью-Йорк) нигез салган голландлылар ярдәмендә беләләр. Нәкъ менә голландиялеләр анда үз традицияләрен алып киләләр, ә менә инглиз пуританнары, киресенчә, Раштуаны озак вакыт танымаганнар. Голландиядә изге Николайның исеме Синтерклаас дип атыйлар. Әйтелештәге кыенлыклар аркасында Синтерклаас Санта-Клауска әйләнә. * Ни өчен Санта-Клаус һәрвакыт кызыл киемнән? Санта-Клаус һәрвакыт кызылдан йөрмәгән. Башта ул күзгә ташланмый торган коңгырт толып кигән һәм ничектер игътибарсыз кала торган булган. Тора-бара ул төсләрен яшелгә, алтынга һәм зәңгәр төсләргә алыштырган. Кафтан һәм кызыл төстәге шапканы Сантага Кока Кола компаниясе бүләк иткән, ул аның образын кыш көне эчемлек сатуны арттыру өчен кулланган һәм Сантаның костюмын үзенең фирмасы төсенә буяган. * Санта-Клаус кайда яши? Сантаның яшәү урыны – Лапландия. Фото: Яндекс

06.12.2024
Эфирда яңа мультсериал

Эфирда яңа мультсериал

«ШАЯН ТВ» каналында яңа мультсериал! Гадәти булмаган «Лудлвилль»! Җиде лудл маҗараларына һәм аларның дусларына кушылыгыз! Биек тау башында зур булмаган бер шәһәр - Лудлвилль урнашкан. Анда гадәти булмаган халык - Лудллар яши. Аларның һәр көне - тулы бер тарих! Кызыклы вакыйгаларның үзәгендә - кечкенә лудл-Энн һәм аның тылсымлы альбомы тора. Анда ясалган теләсә нинди предмет реаль тормышка әйләнергә мөмкин. Шул рәвешле резин үрдәк велосипед шалтыравыгына әверелә, чынаяк - көймә, ә карават – батутны хәтерләтә! Бераз фантазия, тылсым һәм гади генә көн дә маҗараларга әйләнергә мөмкин! Мультсериалны эш көннәрендә 08:55 һәм 16:55 сәгатьләрдә «ШАЯН ТВ» каналында карагыз.

05.12.2024
Prev. 1 ... 44 45 46 47 48 ... 376 Next
Главная Программа Видео Шортс Поиск