Ш.Галиев премиясе лауреатлары билгеле!

    16нчы сентябрь көнне Чаллының Үзәк китапханәсендә 2019 елда «Көмеш кыңгырау» газетасы белән актив хезмәттәшлек иткән авторларга әдәби-иҗтимагый премия тапшырылды.     Тантанада Татарстанның язучылар берлеге рәисе Данил Салихов, язучылар берлегенең Чаллы бүлеге җитәкчесе Факил Сафин, язучылар һәм шагыйрьләр Рәшит Бәшәр, Айгөл Әхмәтгалиева, Зимфира Исламова, Сирень Якупова, Флера Мәрданова, Лилия Фәттахова, Рәкит Әбдельмәнов һәм премиянең хәйриячесе Римма Идиятуллина бар иде.        Шәүкәт Галиев исемендәге премия быел беренче тапкыр тапшырылды. Әлеге премиягә 2019 ел дәвамында «Көмеш кыңгырау» газетасы белән актив хезмәттәшлек иткән бер өлкән автор һәм кызыклы, әдәби яктан камил шигырь, хикәяләре газетада дөнья күргән дүрт укучы бала лаек дип табылды.       Ул лауреатлар - язучы Рәшит Бәшәр,Чаллының 41нче мәктәп укучысы Роза Әмирова, Балык Бистәсе районы Күгәрчен мәктәбеннән Әдилә Мингарипова белән Инсаф Гатауллин һәм Мамадыш районы Кече Кирмән авылыннан Әмир Фәрхуллин. Тулырак: http://chelny-rt.ru/news/il-yaalyklary/challyda-shkt-galiev-isemendge-dbi-itimagyy-premiyane-tapshyr...

Сәхнә түрендә - яңа йолдызлар!

    Бүген Казанның «УНИКС» концертлар залында  «Созвездие-Йолдызлык» фестиваленең гала-концерты узды. Быел фестивль 20нче тапкыр үткәрелә.    Ел саен фестиваль меңнәрчә катнашучыга зур эстрадага юл курсәтә. Шуңа күрә бу сәнгать бәйрәме - яшь артистларның иң көтеп алынган чарасы. Быел да искәрмә түгел, ул иң югары дәрәҗәдә узды! Башкача була да алмый! Уңыш формуласы еллар дәвамында үзгәрешсез кала бирә: оста оештыручылар төркеме,  тәҗрибәле жюри hәм иң сәләтле катнашучылар!          «ШАЯН ТВ» каналы фестивальнең мәгълүмати парнеры буларак чарага үз  өлешен кертте. Каналыбызның төп геройлары концерт кунакларын каршы алды, алар белән бергә күңел ачты, истәлеккә фотога төште.  Тулырак «ШАЯН ТВ» тапшыруларында күрерсез. Карамый калмагыз!

Безнең тарих!

Торналар, торналар...

       Сентябрьнең шушы ямьле чорында торналар көне билгеләп үтелә. Бу матур кошлар әле динозаврлар чорында ук барлыкка килгән. Моннан 40-60 миллион ел элек. Аларның тарихи ватаны булып Төньяк Америка санала. Шуннан алар башта Азиягә, аннары Африка һәм Австралиягә күчеп киткән. Хәзер вакытта алар, Антарктида белән Көньяк Америкадан кала, бөтен дөньяда диярлек бар. Кышны исә Иран һәм көнбатыш Индиядә уздыралар.         Барлыгы торналарның 15 төре билгеле, шуларның 7се Россиягә дә очып килә. Кайбер төрләре Кызыл китапка да кертелгән.

«ШАЯН тарих»

ТАССРга 100 ел!

«Сәйлән» фестиваленең ИКЕНЧЕ сезоны!

    «ШАЯН ТВ» каналында тамашачы мәхәббәтен яулап алган «Сәйлән» телевизион-музыкаль проекты үз эшен дәвам итә. Бүген аның икенче сезоны төшерелә башлады.       Ул яшь йолдызларга тагын да яктырак балкырга, гомумән, татар халкының моңлы киләчәген үстерергә ярдәм итә. Проектның максаты да: татар халык, классик, эстрада җырларын башкаручы яшьләрне барлау; алар өчен иҗади үсеш мөмкинлеге булдыру.      Фестивальдә катнашу өчен, 6-15 яшьлек балалардан 1000гә якын гариза арасыннан, 32 катнашучы чираттагы этапка сайлап алынды. Алар өчен «ШАЯН ТВ» каналы сайтында тамашачылар тавыш бирде. Иң күп тавыш җыйган 12 баланы инде бүгеннән үк проектның җиңүчеләре дип атарга мөмкин, чөнки алар – телевизион этапка чыгучылар!     Конкурсның телевизион сайлап алу этабында (ярымфинал һәм финал) яшь җырчыларны мәртәбәле жюри бәяләячәк. Финалга 6 катнашучы узачак. Аларның кемнәр икәнен октябрь аенда «ШАЯН ТВ» каналында күрә алачакбыз.      Бүгенге сайлап алу этабында сәләтле балаларны эстрадабызның танылган җырчылары Ландыш Нигъмәтҗанова, Айсылу Габдинова, Айдар Сөләйманов, Илгиз Шәйхрәзиев, алып баручы Иван Остроумов бәяләде. Финалга узучылар үз осталыкларын төрле жанрдагы җырлар башкарып күрсәтәчәк. Жюри әгъзалары һәр чыгыштан соң катнашучыга сәйләннәр бирәчәк. Сәйләннәре күбрәк булган катнашучы проектның җиңүчесе дәрәҗәсенә ирешәчәк. Конкурста катнашучылар өчен төрле остаханәләр уздыру да планлаштырыла. Алар вокал, бию, актерлык осталыгы, сәхнәдә үз-үзеңне тоту буенча мастер-классларда катнашачак.

Табигатьнең сары мәле...

    Алтын көз турында шигырь язып карамаган шагыйрьләр, аның матур вакытларын ясамый калган рәссамнар бармы икән? Шундый ямьле чагына кереп барабыз көзнең! Ә сез яфракларның ни өчен саргайганын беләсезме?  Яктылык һәм җылылык җитәрлек булганда, агач яфраклары хлорофилл пигменты ярдәмендә яшел тора. Көннәр кыскарып, төннәр озыная, салкынайта башлагач, фотосинтез процессы акрыная. Хлорофилл урынына антоциан, каротин, ксантофилл кебек пигментлар активлаша. Алар яфракларны сары, кызгылт-сары, хәтта кызыл төсләргә буйый.  Шуңа күрә тизрәк дусларыгыз, әти-әниләрегез белән табигатьнең тагын бер матур чорын фотосурәтләрдә булса да саклап калырга тырышыгыз!