Яңалыклар

Бер дулкында...

Бер дулкында...

«Бер дулкында» проекты нигезендә Түбән Каманың «Апуш» балалар үзәк китапханәсендә һәр шимбә-якшәмбе көннәрендә мәктәпкәчә яшьтәге балалар һәм аларның әти-әниләре өчен төрле темага нәниләрнең рухи үсешен үстерү шөгыльләре уздырыла. Бүген Г. Тукайга багышланган «И туган тел, и матур тел...» исемле чарага «ШАЯН ТВ» каналы төркеме һәм төп герое кунакка килде. Чара барышында алып баручы әңгәмә, уеннар, табышмаклар әйтү, җыр-биюләр, шигырьләр аша Тукайның иҗаты белән таныштырды. Мондый чаралар балаларның белемнәрен киңәйтә, күңелләренә уңай тәэсир итә, зәвыкләрен үстерә, гаилә ялын кызыклы һәм файдалы оештыруга ярдәм итә. Ә тулырак тиздән безнең тапшыруларда!  

10.04.2021
«СалаваТік»ларда кунакта!

«СалаваТік»ларда кунакта!

2021 елның 8 апрелендә 13.00 сәгатьтә Татар дәүләт “Әкият”курчак театрында, “Салават күпере” журналының YouTube каналы проектлары презентациясе үткәрелде. Бәйрәмнең рәсми өлеше мәртәбәле кунаклар – ТР Дәүләт советы рәисе урынбасары, Татарстан Республикасы Президенты каршындагы Татар телен саклау һәм үстерү мәсьәләләре комиссиясе рәисе Марат Әхмәтов, «Татмедиа» Республика матбугат һәм массакүләм коммуникацияләр агентлыгы җитәкчесе Айдар Сәлимгәрәев, «ТАТМЕДИА» АҖ генераль директоры Шамил Садыйков, Фән һәм Мәгариф министрлыгыннан кунаклар катнашында үтте. Беренче татар балалар каналы «ШАЯН ТВ» да дусларыбыз үткәргән күркәм чараны игътибарсыз калдыра алмады. Каналыбызның төп герое хезмәттәшләребезне котларга килде, балалар белән күңел ачты, бүләкләр дә алып килде! Искәртеп үтик: “ТАТМЕДИА” АҖ 2020 елдан, Татарстан Республикасы Президенты каршындагы Татар телен саклау һәм үстерү мәсьәләләре комиссиясе ярдәме белән, «Татмедиа JUNIOR» («Яшь Татмедиа») проектын тормышка ашыра. Проект кысаларында балалар өчен YouTube каналда татар телендә тематикасы ягыннан төрле булган, төрле яшьтәге аудитория өчен видеолар әзерләнә.

08.04.2021
Гран-при иясе!

Гран-при иясе!

Кичә «Сәйдәш» мәдәният үзәгендә «Созвездие-Йолдызлык» Казан яшьләр эстрада сәнгате фестивале Гала-концерты узды! «ШАЯН ТВ» каналы әлеге күркәм чараның мәгълүмати партнеры вазифасын башкарды! Ел саен фестиваль меңнәрчә катнашучыга зур эстрадага юл курсәтә. Шуңа күрә бу сәнгать бәйрәме - яшь артистларның иң көтеп алынган чарасы. Безнең коллегабыз - «ШАЯН ТВ» каналы алып баручысы Инсаф Ганибаев өчен әлеге фестиваль аеруча истәлекле булып калыр! Ул Гран-при яулады! Котлыйбыз!

07.04.2021
«Глаголица» яңа сезон игълан итә!

«Глаголица» яңа сезон игълан итә!

Татарча шигырьләр яки хикәяләр язасыңмы? Яшең 10 нан 17 гә кадәрме? Халыкара проект – «Глаголица» премиясендә катнаш. «Глаголица» бәйсез әдәби премиясе яңа сезонын ачып җибәрә! «Глаголица» – үзеңне таныту өчен менә дигән мөмкинлек: ·         финалистларның әсәрләре чын китапта – Альманахта басылып чыгачак ·         конкурс эшләре республикабызның балалар журналларында дөнья күрәчәк «Глаголица» – иҗади талантыңны шомарту мөмкинлеге: 120 катнашучы әдәби сменага юллама алачак. Алар ·         Ркаил Зәйдулла, Рөстәм Галиуллин, Галимҗан Гыйльманов, Рифат Сәлах һ.б. Татарстанның танылган язучылары һәм шагыйрьләре белән остаханәләрдә катнашачак. ·         «Әдәби һөнәрханә» дәресләрендә яңа юнәлешләр белән танышачак. «Глаголица» – кызык һәм күңелле: ·         монда яңа дуслар табарсың ·         яшь каләмдәшләрең һәм әйдәманнар белән Казанны гизәрсең ·         осталар белән бергә истәлекле бүләкләр һәм сувенирлар ясарсың «Глаголица» – искиткеч бүләкләр оту мөмкинлеге: ·         бүләкләү фондында 36 электрон планшет ·         36 кече китапханә ·         Гран-При ияләренә 8 Бәллүр ябалак бар Тизрәк www.glagolitsa-rt.ru сайтында теркәл һәм әсәреңне конкурска җибәр. «Глаголица» бәйсез әдәби премиясе яшь язучыларны, шагыйрьләрне һәм тәрҗемәчеләрне көтеп кала! P.S. www.glagolitsa-rt.ru сайтында «Глаголица» премиясенең положениесе белән танышмый калмагыз. Сорауларыгыз булса, glagolitsa-rt@yandex.ru оештыру комитетына хат языгыз йә +7 (843) 561-06-12 телефонына шалтыратыгыз. Эшләрне кабул итү 17.09.2021 көнне тәмамлана.

06.04.2021
«Торни һәм аның дуслары»

«Торни һәм аның дуслары»

Иртәгә «ШАЯН ТВ» каналында яңа мультсериал! «Торни һәм аның дуслары» -Торни һәм аның гаиләсе турында кызыклы мультсериал! Торни – нәни керпе. Ул әнисе, әтисе, апасы һәм энекәше белән бергә яши. Бергәләшеп алар күңел ача, рәсемнәр ясый, спорт белән шөгыльләнә һәм яңа дуслар белән таныша! «Торни һәм аның дуслары» мультсериалын «ШАЯН ТВ» каналында дүшәмбедән җомгага кадәр 8:10да һәм 16:10да карагыз!

05.04.2021
«Балалар китабы серләре»

«Балалар китабы серләре»

2021 елның 2 нче апрелендә Татар Китабы йортында Халыкара балалар китабы көне уңаеннан «Балалар китабы серләре» дип исемләнгән чаралар циклы кысаларарында Беренче татар балалар телеканалы презентациясе үтте. Халыкара балалар китабы көне Һанс Христиан Андерсенның туган көнендә – 2 нче апрель көнне билгеләнә. 1967 елдан бирле Балалар китабы буенча халыкара оешмасы тарафыннан уздырылып килә. Быел бәйрәм уңаеннан Татар әдәбияты тарихы музее һәм Шәриф Камал мемориаль фатиры (Татар китабы йорты) берничә аерым чарадан торган цикл тәкъдим итте. Ике көн дәвамында Татар китабы йорты бинасында танылган шәхесләр белән очрашулар, кызыклы уеннар һәм лекторийлар үткәрелде! Беренче татар балалар телеканалы да тамашачыларга үз программасын тәкъдим итте. Кунакларны китап сөюче героебыз ШАЯН каршы алды.    

02.04.2021
«Киләчәккә адым»

«Киләчәккә адым»

     Кичә «ШАЯН ТВ» Актаныш районының үзәк мәдәният йортында «Киләчәккә адым» балалар техник иҗат фестивалендә сәләтле балалар белән танышты! Фестиваль бу елны тәүге кат, Татарстанда Туган телләр һәм халыклар бердәмлеге елы уңаеннан үткәрелде. Биредә техник һөнәрләрне үз итүче, бу юнәлештә зур уңышларга ирешкән яшь талантларны данлау һәм бүләкләү тантанасы үтте. Фестиваль кысаларында балаларның кул эшләре, иҗат проектлары күргәзмәсе тәкъдим ителде.      «ШАЯН ТВ» яшь «Кулибин»нарны игътибарсыз калдыра алмады! Шулай ук, канал төркеме әлеге фестивальнең чишмә башында торган Актаныш районы башлыгы Энгель Нәвап улы Фәттахов белән очрашты, фестиваль киләчәге турында әңгәмә корылды. Тулырак «ШАЯН ТВ» каналында, "Яшьләр тукталышы" һәм "Шаян балалар" тапшыруында карагыз. 

31.03.2021
Prev. 1 ... 242 243 244 245 246 ... 386 Next
Главная Программа Видео Шортс Поиск