Казанда Сабантуй-2026: кайда барырга, нәрсә карарга һәм ничек барып җитәргә?

20 июньдә Казанда иң матур һәм күңелле милли бәйрәмнәрнең берсе — Сабантуй узачак. Быел бәйрәм чаралары берьюлы өч мәйданчыкта үтәчәк: Мирный бистәсендә, Лебяжье күле буенда һәм Дәрвишләр бистәсендәге Каенлыкта. Шулай ук бәйрәм программасы һәм ат чабышлары Казан ипподромында да оештырылачак.

Мирный — бәйрәмнең төп мәйданчыгы

Гадәттәгечә, иң зур чаралар Мирный бистәсендәге Каенлыкта узачак. Бәйрәм 45 минутлык театральләштерелгән пролог белән ачылачак, анда бию коллективлары чыгыш ясаячак.

Аннары кунакларны Казан филармониясе артистлары һәм татар эстрадасы йолдызлары катнашындагы дүрт сәгатьлек зур концерт көтә.

Лебяжье 

Лебяжье күле янындагы мәйданчык та бәйрәм кунакларын каршы алачак. Биредә дә театральләштерелгән ачылыш һәм дүрт сәгать дәвам итәчәк зур концерт узачак.

Кунаклар өчен ял зоналары, фотолокацияләр, гаилә белән катнашу өчен активлыклар һәм төрле интерактив мәйданчыклар әзерләнә. Теләүчеләр татар халкының милли уеннарында катнаша, гореф-гадәтләр белән таныша, тематик күргәзмәләр һәм остаханәләргә йөри алачак.

Дәрвишләр 

Дәрвишләр бистәсендәге Каенлык Сабантуйның иң озын концерт программасын тәкъдим итәчәк. Биредә алты сәгатьтән артык вакыт дәвамында иҗат коллективлары, җырчылар, бию ансамбльләре һәм татар эстрадасы артистлары чыгыш ясаячак.

Моннан тыш, бәйрәм кунаклары өчен көне буе эшләячәк зур спорт мәйданчыгы да оештырылачак.

Казан ипподромы

Сабантуйның аерылгысыз өлеше булган традицион ат чабышлары Казан ипподромында узачак. Ел саен нәкъ менә ат ярышлары бәйрәмнең иң мавыктыргыч һәм көтеп алынган вакыйгаларының берсе булып тора.

🚍 Ничек барып җитәргә?

Кунаклар өчен бәйрәм көнендә гадәттәгечә өстәмә автобус маршрутлары һәм махсус шаттллар эшләячәк.

🔹  Мирныйга махсус автобуслар белән һәм «Каенлык» тимер юл платформасына кадәр электричкада барып җитәргә мөмкин булачак.

🔹  Лебяжье күле һәм Дәрвишләр юнәлешендә җәмәгать транспорты маршрутлары көчәйтеләчәк.

Транспорт хәрәкәтенең тулырак схемасын шәһәр хакимияте бәйрәм алдыннан игълан итәчәк.