Баян – балачактан сайланган юл

– Син ни өчен нәкъ менә Казан музыка көллиятен сайладың һәм белгечлегең – баян булуы ничек формалашты?
– Минем белгечлегем – баян. Балачагымнан ук бабаемның баянда уйнавын тыңларга ярата идем. Нәкъ менә ул миңа бу уен коралын сөяргә һәм аны сайларга этәргеч бирде, дип уйлыйм. Ә укырга керәсе колледжны мин музыка мәктәбендә укыган чакта ук билгеләп куйган идем. Казан – зур, заманча шәһәр, ә Казан музыка көллияте яхшы белем бирүе һәм данлыклы чыгарылыш укучылары белән билгеле.

– Музыка көллиятендә уку гадәти мәктәп яки вуздан нәрсәсе белән аерыла?
– Көллияттә белем алу күпкә таләпчәнрәк. Музыкаль коралда уйнауга аеруча зур игътибар бирелә, музыкаль-теоретик фәннәр дә тирәнтен өйрәнелә. Музыка мәктәбе укучылары өчен авыр тоелырлык предметлар да бар. Монда уку тырышлык, үз-үзеңә таләпчәнлек һәм тәртип сорый.

– Икенче курс студентының гадәти уку көне ничек үтә?
– Минем очракта көннең күп өлеше баян белән шөгыльләнүгә китә. Зачетлар һәм имтиханнар өчен бик күп әсәрләр өйрәнергә кирәк, өстәвенә аларны тыңлаучыга эмоциональ һәм музыкаль яктан дөрес итеп җиткерү мөһим. Уртача алганда, мин көненә 5-7 сәгать үз коралымда уйныйм: парлар арасында да, кайчак дәресләрдән соң да калып шөгыльләнәм.

– Уку барышында нинди кыенлыклар белән очраштың?
– Зур авырлыклар дип әйтерлек булмады, бары тик уку материаллары күләме артты. Шулай ук иртән көллияткә барып җитү дә шактый вакыт ала. Әгәр арыганымны сизсәм, үз-үземә ял бирергә тырышам – бу да бик мөһим.

– Сиңа иң зур йогынты ясаган укытучылар яки фәннәр бармы?
– Әлбәттә, иң зур йогынтыны минем белгечлегем буенча укытучым ясый. Ул – укытучы да, җитәкче дә. Аның кул астында мин баян сәнгатенең төп нечкәлекләрен үзләштерәм.

– Укуны чыгышлар һәм эш белән бергә алып бару мөмкинме?
– Әйе, мөмкин. Музыкант өчен чыгышлар бик кирәк, чөнки алар тәҗрибә тупларга ярдәм итә. Өстәвенә, матди яктан да, аз булса да, студент кешегә файда китерә.

– Көллиятне тәмамлагач, үзеңне кайсы өлкәдә күрәсең?
– Үземне төрле юнәлешләрдә күрәм: оркестр составында да, укытучы буларак та, хәтта артист юлын да кире какмыйм. Киләчәктә музыка өлкәсендә үз юлымны табармын дип ышанам.

– Музыка көллиятенә керергә җыенган абитуриентларга нинди киңәшләр бирер идең?
– Иң беренче чиратта, үз белгечлегеңә һәм сольфеджиога игътибарны арттырырга киңәш итәм, чөнки кереш имтиханнарда болар – төп фәннәр. Һәм, әлбәттә, борчылмаска кирәк: әгәр чын күңелдән тырышсаң, максатыңа ирешү мөмкин.

Казан музыка көллиятендә уку тәҗрибәсе белән уртаклашкан собеседник –  икенче курс студенты, баянчы Илдус Хәйриев. Аның сөйләве буенча, музыка көллиятендә уку югары дәрәҗәдә үз-үзеңә таләпчәнлек, дисциплина һәм эшкә чын күңелдән мәхәббәт сорый, шул ук вакытта профессиональ һәм иҗади үсеш өчен киң мөмкинлекләр ача.

Источник фото: "СӘЛӘТ"