Табиблар көзен кеше организмына файдалы 5 ризыкны атады:

1. Беренче урынга гранатны куялар. Гранат - С витамины, антиоксидантлар чыганагы. Даими гранат куллану онкологик чирләр, диабет, йөрәк-кан тамырлары системасы чирләрен кисәтергә булыша. Гранатта клетчатка күп, ул эчәклек эшчәнлеген яхшырта.

2. Икенче урында - кабак. Ул эчәклек эшчәнлеген яхшырта торган азык җепселләренә бай, токсиннарны чыгара, холестеринны җайга сала. Кабакта бета-каротин күп, ул күзләргә, кан тамырларына файдалы. Шулай ук тире, чәч торышын яхшырта.

3. Мүк җиләге С витаминына бай, анда В группасы витаминнары, магний, селен, цинк күп, шуңа күрә ул вируслы чирләрдән саклый, иммун системасын ныгыта.

4. Сырганак - цинк, магнийга бай, анда ашкайнату системасы һәм үт куыгы эшчәнлеген яхшырта торган азык җепселләре бар.

5. Сезонлы ризыкларга белгечләр гөмбәне дә керткән. Гөмбәнең эчәклекне пребиотиклар белән тәэмин итүен раслаганнар.